1. OBXECTO.

1.1. Este Contrato ten por obxecto a comercialización de enerxía eléctrica por parte de ENERXÍA GALEGA MÁIS S.L. (en diante a COMERCIALIZADORA) ao Cliente, como comercializadora no mercado libre, coas condicións e no punto de subministración (CUPS) nos termos incluídos nestas condicións xerais e nas condicións particulares que constan nel. O Cliente acepta de forma expresa e como única modalidade, salvo que se indique o contrario nas condicións particulares, a contratación conxunta da adquisición da enerxía e do acceso á rede a través da COMERCIALIZADORA. O presente Contrato ten carácter persoal e a enerxía subministrada destinarase de modo exclusivo ao consumo do Cliente no punto de subministración incluído nas Condicións Particulares, o cal deberá ser o efectivo usuario da enerxía subministrada, sen que este poida cedela, vendela, alleala ou poñela á disposición de terceiros sen o previo consentimento da COMERCIALIZADORA, nin utilizala noutro lugar ou para fins distintos aos establecidos nas Condicións Particulares.

En caso de discrepancia entre os diferentes textos contractuais, a orde de prelación será a seguinte: Condicións Particulares do Contrato de Subministración, Condicións Xerais do Contrato de Subministración.

2. PREZO, TARIFA DE ACCESO E MODIFICACIÓN DE TARIFAS.

2.1. O Cliente está obrigado a pagar á COMERCIALIZADORA a electricidade consumida e as peaxes de acceso á rede e custos da Distribuidora conforme ás Condicións Particulares do produto contratado e aos prezos pactados neste Contrato.

2.2. Serán así mesmo a cargo do Cliente, modificando polo tanto o prezo aplicable, calquera alteración dos conceptos, actividades ou compoñentes regulados que puidesen aprobarse pola Administración durante a vixencia do presente Contrato. As referidas cantidades serán trasladadas automaticamente e de maneira íntegra aos prezos da subministración na medida en que sexan de aplicación e sen que iso poida considerarse modificación das condicións contractuais. En caso de contratos co mesmo prezo de enerxía en todos os períodos tarifarios, calcularase e aplicarase a mesma variación en todos os períodos.

2.3. En canto á subministración eléctrica, o Cliente estará obrigado ademais ao pagamento da enerxía reactiva e da potencia, conceptos que se facturarán de acordo co sistema previsto na Circular 3/2020 e as súas modificacións, salvo no caso de que o consumo anual en termo de enerxía non supere os 20.000 kWh ano, circunstancia na que se facturará sempre, como mínimo, a potencia contratada, sen prexuízo de facturar os excesos sobre a potencia contratada se a iso houbese lugar, caso no cal se aplicaría o establecido no Real Decreto 1164/2001 ou normativa que o substitúa.

2.4. Os prezos pactados neste Contrato poderán actualizarse o día 1 de xaneiro de cada ano conforme ao incremento do IPC publicado polo Instituto Nacional de Estatística. Para estes efectos terase en conta a variación do IPC acumulada nos doce meses previos ao mes de novembro anterior ao momento de producirse a actualización contractual de prezos aquí pactada.

2.5. A COMERCIALIZADORA resérvase o dereito de facturar ao Cliente de forma diferenciada os custos dos Servizos de Axuste do Sistema de Rede Eléctrica de España (en diante, SAS) segundo a modalidade de produto contratado e conforme ao definido nas condicións particulares.

Nos contratos de calquera modalidade indexada, os custos dos Servizos de Axuste do Sistema de Rede Eléctrica de España (SAS) serán trasladados en todo momento ao Cliente.

2.6. Poderá ser instada a modificación dos prezos que figuran nas Condicións Particulares pola COMERCIALIZADORA, na data de renovación do contrato e durante calquera das súas prórrogas, debendo ser debidamente comunicados ao Cliente, mediante escrito dirixido a el ou nota na factura habitual de consumo anterior á modificación, cunha antelación de 30 días á entrada en vigor. Se o Cliente non estivese de acordo con dita modificación terá que comunicar a súa decisión ao respecto a ENERXÍA GALEGA MÁIS S.L. cunha antelación de 15 días, podendo incluso solicitar a resolución do contrato sen penalización ningunha. Transcorridos trinta días desde a comunicación ao Cliente da revisión do prezo sen que este manifestase a súa vontade ao respecto, entenderase que acepta a modificación das Condicións Particulares.

O Cliente foi expresamente advertido de que, en caso de que dea por resolto ou finalizado o presente Contrato, debe formalizar un Contrato cunha nova COMERCIALIZADORA, dado que ENERXÍA GALEGA MÁIS S.L., seguindo a súa petición, deixará de comercializarlle a luz e pasarao á CUR (Comercializadora de Último Recurso).

2.7. Todo tipo de tributos (impostos, taxas, prezos públicos, recargos territoriais, etc.) e calquera outro gravame que puidese establecerse por calquera tipo de norma de ámbito estatal, autonómico, local ou sentenza xudicial aplicables á presente subministración serán a cargo do Cliente, quen virá obrigado ao seu pagamento aos tipos vixentes e cos efectos temporais que se establezan en cada momento. Para estes efectos, o Imposto Especial sobre a Electricidade aplicarase sobre o importe resultante da suma do termo de enerxía, do termo de potencia e calquera outro concepto relacionado cos anteriores. As variacións á alza destes conceptos ou os incrementos producidos no prezo por aplicación das Condicións Xerais 2.2. e 2.4. non darán ao Cliente o dereito para desistir ou resolver o Contrato.

2.8. En canto á subministración eléctrica, en caso de contratar prezo indexado, aos custos do operador do sistema aplicaráselles unha corrección de euro e medio por MWh, para axustar as desviacións existentes entre os valores provisionais calculados por REE e os reais.

2.9. Será trasladada automaticamente ao Cliente calquera garantía de pagamento solicitada pola Empresa Distribuidora. A non entrega da mencionada garantía pode ser motivo de resolución ou non aceptación e activación do Contrato.

2.10. Para o cálculo dos prezos priorizarase o uso da medida cuarto-horaria, sempre suxeito á viabilidade técnica e operativa da COMERCIALIZADORA. Para clientes sen medida cuarto-horaria, poderase realizar a interpolación cuarto-horaria de REE publicada no Procedemento Operativo 10.5.

2.11. O custo regulado da achega ao Fondo Nacional de Eficiencia Enerxética regularizarase anualmente cada 1 de xaneiro, tras a publicación da Orde Ministerial que estableza as achegas ao FNEE en cada ano. Dito custo regulado calcularase como o cociente entre o importe económico equivalente á obriga de aforro do ano en que se regulariza o custo, sen certificados voluntarios de aforro enerxético, e as vendas durante o segundo ano anterior ao período anual da obriga, utilizando os datos da Orde Ministerial.

2.12. En caso de que o Cliente teña concedida, ou se lle conceda no futuro, pola Administración competente, calquera tipo de dedución do Imposto Especial sobre a Electricidade, dita dedución aplicarase nas facturas a partir da data en que ENERXÍA GALEGA MÁIS S.L. reciba do Cliente, a través de calquera dos medios establecidos, unha copia da Tarxeta de Inscrición no Rexistro Territorial co Código de Identificación da Electricidade (CIE) onde se especifique claramente a porcentaxe de dedución a aplicar na facturación. En caso de que o Cliente presente dita documentación unha vez iniciado o período de subministración non procederá a aplicación retroactiva de dita dedución.

3. DURACIÓN.

O presente Contrato de subministración subscríbese por un prazo de duración dun ano, a contar desde o inicio da subministración e será prorrogado automaticamente por períodos anuais de non mediar comunicación previa por escrito de calquera das partes cunha antelación mínima de 15 días á data do vencemento ou de calquera das súas prórrogas.  No suposto de que o Cliente sexa unha persoa física con subministración de tarifa 2.0TD con tarifas indexadas, non existirá vínculo de permanencia nin penalización por resolución anticipada.

O proceso de contratación con ENERXÍA GALEGA MAIS S.L. comezará no momento no que se formalice o contrato de subministración, podendo especificar o Cliente á COMERCIALIZADORA a data na que se desexa facer efectivo o cambio. En caso de non facelo, será no prazo máis breve posible e sempre a partir da activación da subministración por parte da Distribuidora.

Así, o Contrato entrará en vigor no momento en que se dispoña do acceso á rede de distribución, unha vez a COMERCIALIZADORA verificase a realidade dos datos achegados polo Cliente á sinatura do Contrato, así como a súa adecuada e suficiente solvencia.

A eficacia do contrato quedará condicionada á concesión por parte da Distribuidora do contrato ATR.

4. ACCESO Á REDE DE DISTRIBUCIÓN.

ENERXÍA GALEGA MÁIS S.L., realizará en nome e por conta do Cliente, quen a apodera expresamente coa sinatura deste Contrato, as xestións oportunas ante a Distribuidora para que solicite e contrate o acceso á rede do punto de subministración obxecto de Contrato. A sinatura deste Contrato supón a autorización do Cliente a ENERXÍA GALEGA MÁIS S.L., para que esta realice ante a Distribuidora cantas xestións sexan necesarias para o bo fin da subministración e para a notificación e cancelación do Contrato que, con anterioridade á data do presente, puidese ter con outras Comercializadoras. O Cliente autoriza expresamente a ENERXÍA GALEGA MÁIS S.L., para que esta poida actuar na súa representación fronte á súa anterior Comercializadora. En ningún caso esta autorización se entenderá estendida á xestión, modificación ou cancelación de servizos adicionais, contratos distintos da subministración eléctrica ou calquera outros produtos que o Cliente puidese ter subscritos coa súa anterior comercializadora.

O presente Contrato poderá formalizarse sen incluír o Acceso de Terceiros á Rede (ATR), se así se expresa nas Condicións Particulares. En tal caso, o prezo da subministración non incorporará as peaxes de acceso nin os cargos do sistema eléctrico vixentes en cada momento, os cales serán descontados del. Ditos conceptos serán facturados directamente ao cliente pola empresa Distribuidora, sendo da súa exclusiva responsabilidade o pagamento dos mesmos.

ENERXÍA GALEGA MÁIS S.L. poderá esixir ao Cliente, no momento da contratación, a entrega dun depósito de garantía a favor da empresa Distribuidora da zona, nos termos e polo importe establecido legalmente. A devolución do depósito de garantía efectuarase á resolución do Contrato de Subministración, podendo ENERXÍA GALEGA MÁIS S.L. aplicar a parte correspondente do mencionado depósito de garantía ao saldo de cantidades pendentes de pagamento.

Os dereitos de acometidas polas solicitudes de nova subministración ou ampliación das existentes, así como os dereitos relativos á verificación ou reconexión da instalación do Cliente que correspondan percibir ao distribuidor serán a cargo do Cliente.

5. EQUIPO DE MEDIDA E CONTROL DE ENERXÍA ELÉCTRICA.

5.1. O Cliente deberá dispoñer dun punto de subministración, cun Equipo de Medida e Control da enerxía subministrada que deberá cumprir coa normativa aplicable a este tipo de dispositivos, sendo o Cliente responsable da súa custodia e do cumprimento do resto de obrigas establecidas pola lexislación vixente. O punto de medida e facturación está fixado nas instalacións do Cliente. A tensión nominal e as potencias contratadas ás que se efectúa a subministración son as que figuran nas Condicións Particulares do presente Contrato. En caso de discrepancia entre a información referente ao punto de subministración que obre en poder da compañía Distribuidora, en canto a potencia, tarifa de acceso contratadas e a tensión da subministración e a información facilitada polo Cliente, aceptarase a información da compañía Distribuidora para os efectos oportunos.

5.2. A Empresa Distribuidora é a responsable de realizar as lecturas dos consumos de enerxía. A COMERCIALIZADORA utilizará estas lecturas para a facturación ao Cliente. En caso de que as tomas de lecturas non sexan realizadas antes da finalización do Período de Facturación, o Equipo de Medida funcionase de forma deficiente ou fallase e non se dispuxese dos datos de consumo para calquera dos períodos horarios, ou ben os datos rexistrados polo Equipo de Medida fosen ilexibles, o Cliente faculta expresamente á COMERCIALIZADORA a facturar unha cantidade estimada, tomando como referencia os consumos do seu Punto de Subministración correspondentes á medida horaria, ou aos consumos do ano anterior para o mesmo período de aplicación, ou en caso de non existir eses datos, usando como parámetros razoables de equivalencia a potencia contratada e o perfil tipo de consumo do cliente, de forma análoga ao que estableza a normativa vixente.

5.3. En caso de que o contador instalado ou outros compoñentes o estean en réxime de alugueiro, a COMERCIALIZADORA realizará a facturación deste concepto por conta do distribuidor, incluíndo o mesmo as seguintes tarefas: a instalación ou adaptación de equipos, o mantemento, a verificación e a validación de consumos.

5.4. Os gastos que orixinen os traballos de enganche, extensión, reconexión, verificación, ou outros dereitos de acometida necesarios para atender a nova subministración ou para a ampliación ou reconexión da xa existente, así como outros normativamente establecidos e que deban pagarse á Empresa Distribuidora, serán a cargo do Cliente quen os asume integramente.

Así mesmo, o Cliente autoriza expresamente á COMERCIALIZADORA a acceder aos datos de medida procedentes do seu contador telemedido, en caso de dispoñer del, a través das canles habilitadas pola Distribuidora ou por medios propios do Cliente.

5.5. O Cliente comprométese a non manipular o Equipo de Medida e Control, e a informar á COMERCIALIZADORA no caso de que se detectase un funcionamento anormal do Equipo de Medida e Control ou incidencias nel. Calquera manipulación fraudulenta ou intencionada no equipo de medida facultará á COMERCIALIZADORA a resolver de forma automática e inmediata o presente Contrato.

5.6. O Cliente obrígase a facilitar o acceso á empresa Distribuidora ao Equipo de Medida e Control, co fin de levar a cabo a instalación, inspección, lectura, mantemento, verificación e control, así como outras actuacións que resulten necesarias para a consecución do Contrato de Subministración e en cumprimento da normativa en vigor.

5.7. A partir do punto de subministración, a titularidade, o risco e a responsabilidade da enerxía subministrada pola Distribuidora serán por conta do Cliente. O Cliente responderá do bo estado da súa instalación interior e da realización das revisións e/ou inspeccións obrigatorias e de manter, en perfecto estado de conservación, as instalacións receptoras, incluídos os aparellos de consumo e de facer un uso adecuado dos mesmos. O Cliente responsabilízase dos danos, propios e a terceiros, que sexan causados pola defectuosa instalación ou conservación das súas instalacións.

6. CALIDADE DE SUBMINISTRACIÓN.

De conformidade co previsto na Lei 24/2013 do Sector Eléctrico e os seus regulamentos de desenvolvemento correspondentes, a Empresa Distribuidora coa cal o Cliente contratou o acceso á rede é a responsable da operación e mantemento da rede e da calidade da subministración, cobrando por iso as correspondentes Peaxes de Acceso. A COMERCIALIZADORA non será en ningún momento responsable da falta de calidade de subministración ou dos danos que puidesen producirse ao Cliente por interrupcións, cortes de subministración, baixadas de tensión, etc.., debendo dirixir o Cliente calquera reclamación derivada da defectuosa calidade da subministración á Empresa Distribuidora coa cal contratase o acceso á rede. Para o suposto de que o acceso á rede fose contratado pola COMERCIALIZADORA, actuando como representante do Cliente, ENERXÍA GALEGA MÁIS S.L. obrígase a facilitar ao Cliente a identidade e domicilio da referida Distribuidora e a subministrar as maiores facilidades posibles ao Cliente para unha eventual compensación da Distribuidora polas posibles deficiencias nos niveis de calidade da subministración.

7. FACTURACIÓN E PAGAMENTO.

7.1. A COMERCIALIZADORA realizará a facturación da subministración de enerxía con base e na periodicidade das lecturas facilitadas pola Distribuidora encargada da lectura. No suposto de que, por razóns alleas á COMERCIALIZADORA, a encargada da lectura non remitise as lecturas necesarias para facturar a subministración durante un período superior a un mes, a COMERCIALIZADORA poderá estimar o consumo de dito período utilizando o mecanismo establecido na Condición 5.2., procedendo coa facturación que corresponda e reliquidando en facturacións posteriores, conforme á normativa de aplicación, os excesos ou defectos de facturación. A facturación do termo de potencia levarase a cabo por días, procedendo a COMERCIALIZADORA a regularizar dito concepto de acordo coa facturación emitida pola empresa Distribuidora ao final do período contractual e, en todo caso, na medida que lle sexa posible antes da finalización do mesmo. A factura enviarase ao Cliente por correo postal ou electrónico, autorizando en calquera caso o Cliente á COMERCIALIZADORA para que por si mesma, ou a través dun terceiro no seu nome, lle remita as facturas derivadas deste Contrato de Subministración por medios electrónicos. O vencemento da factura e a correlativa obriga de pagamento por parte do Cliente será de sete (7) días naturais desde a data de emisión da factura, salvo que nas condicións particulares se estableza unha data específica de vencemento ou de cargo, caso no cal prevalecerá esta última. O pagamento realizarase mediante domiciliación bancaria que o Cliente designase nas Condicións Particulares e deberá producirse na data de recepción pola entidade bancaria da comunicación do importe da factura. O Cliente obrígase a proporcionar estas instrucións á entidade bancaria, así como a manter ditas instrucións durante o período íntegro de vixencia do presente Contrato e autoriza á COMERCIALIZADORA a cargar a factura á conta bancaria do Cliente. Se o Cliente ostentase a calidade de Consumidor ou Usuario, iso de conformidade co previsto no Real Decreto Lexislativo 1/2007 ou normativa complementaria, sexa estatal ou autonómica, estarase en cada caso ao que estableza esa normativa de aplicación salvo que as Condicións Xerais aquí pactadas para todo tipo de Cliente fosen máis beneficiosas para o Consumidor ou Usuario.

7.2. O Cliente incorrerá automaticamente en mora sen necesidade de intimación ningunha en caso de incumprir a obriga de pagamento na forma prevista anteriormente. En caso de incorrer en mora, o Cliente virá obrigado a pagar un 10% do importe da factura, cun máximo de 30 € e un mínimo de 6 € en concepto de xestión de gastos de recobro, e os eventuais gastos de reenganche de subministración por parte da Distribuidora, ademais de calquera outro gasto que poida xerar dito impagamento para a COMERCIALIZADORA. Todo o anterior, sen prexuízo da facultade de suspensión da subministración da cláusula 9 deste Contrato. Os pagamentos parciais imputaranse aos xuros debidos e, no que excedan destes, á amortización de débeda. En caso de impagamento e cumpríndose cos requisitos establecidos na Lei, a COMERCIALIZADORA poderá proceder á comunicación da incidencia aos servizos de información sobre cumprimento de obrigas dinerarias. En caso de que a Empresa Distribuidora con quen se asinase o Contrato de acceso proceda a suspender a subministración por esta causa, durante a vixencia do presente Contrato, serán a cargo do Cliente todos os gastos derivados da suspensión e eventual reposición da subministración, incluídas as penalizacións que repercuta a Empresa Distribuidora. A interrupción da subministración por impagamento de débedas contraídas coa Distribuidora poderá dar lugar á resolución do presente Contrato a instancia da COMERCIALIZADORA, entendéndose neste caso que a resolución é responsabilidade exclusiva do Cliente, podendo ENERXÍA GALEGA MÁIS S.L. reclamar a indemnización prevista na condición 9.2.

8. CESIÓN DO CONTRATO.

Sempre e cando estea ao corrente do pagamento, o Cliente poderá ceder o seu Contrato a outro consumidor que vaia facer uso del en idénticas condicións, previa presentación por escrito das solicitudes de cambio de titularidade coas sinaturas conxuntas do Cliente e do novo titular, ou ben, facilitando a documentación pertinente que acredite o novo titular para efectuar dito cambio, cuxa efectividade quedará condicionada ao citado cesamento e ao cumprimento dos procedementos aplicables, á correcta formalización da documentación correspondente e, se é o caso, á súa validación pola empresa distribuidora. O cambio de COMERCIALIZADORA por parte do Cliente incumprindo a Lei ou o pactado neste Contrato, especialmente polo que ao compromiso de permanencia corresponde, considerarase incumprimento contractual por parte do Cliente cos efectos previstos na cláusula 9.2. do presente Contrato.

9. RESOLUCIÓN DO CONTRATO DE SUBMINISTRACIÓN.

9.1. A COMERCIALIZADORA poderá resolver o Contrato nos seguintes supostos:

1. a) Por cumprimento do prazo convido ou dalgunha das súas prórrogas.
2. b) Por mutuo acordo entre Cliente e COMERCIALIZADORA.
3. c) Que o Cliente non satisfixese calquera dos importes debidos en virtude deste Contrato. O exercicio pola COMERCIALIZADORA do dereito a resolver o contrato e suspender a subministración non exime o Cliente da obriga de pagar o importe da facturación pendente, conforme ao establecido no Contrato de Subministración.
4. d) Nos supostos previstos na normativa eléctrica vixente, e de forma especial o incumprimento de calquera obriga que dita normativa impoña ao Cliente como usuario do servizo.
5. e) A non aceptación polo Cliente da modificación das condicións económicas por parte da COMERCIALIZADORA, nos termos establecidos nas Condicións 2.4. e 2.5.
6. f) No caso de que o Cliente incorrese en situación de concurso de acredores, coas salvedades que a normativa de aplicación estableza.
7. g) Que o Cliente incumprise calquera das obrigas previstas no presente Contrato de Subministración.
8. h) Desistencia do Cliente antes da data de finalización do contrato.
9. i) En caso de forza maior.

9.2. No suposto de resolución por desistencia do Cliente antes da data de finalización do contrato este perderá o dereito a todos os descontos, bonificacións ou beneficios aplicados pola COMERCIALIZADORA, durante dito período, cuxo importe será facturado ao Cliente, todo iso sen prexuízo das obrigas de indemnización previstas a continuación. Coa excepción das subministracións indicadas no parágrafo primeiro da Condición Terceira deste contrato, a rescisión do Contrato por parte do Cliente con anterioridade á data de finalización do Contrato dará lugar a unha penalización económica consistente no 5% da enerxía estimada pendente de subministración, excluíndo os descontos aplicados, de conformidade co establecido no artigo 28 do Real Decreto 88/2026, do 11 de febreiro, polo que se aproba o Regulamento xeral de subministración, comercialización e agregación de enerxía eléctrica, a pagar polo cliente, excepto cando a rescisión se deba á modificación das Condicións Particulares por parte da COMERCIALIZADORA, de acordo coa estipulación 2.6.

Se o Cliente ostentase a calidade legal de Consumidor ou Usuario de conformidade coa normativa estatal e autonómica aplicable ao presente caso, estarase en canto á suspensión da subministración por impagamento do Cliente ou por outros motivos á referida normativa en canto esta sexa de aplicación obrigatoria en aras á protección dos intereses do consumidor ou usuario.

No suposto de que fose unha subministración en Alta Tensión, a rescisión do Contrato por parte do Cliente con anterioridade á data de finalización dará lugar a unha penalización económica equivalente a 0,02 €/kWh aplicada sobre a enerxía estimada pendente de subministración.

9.3. Se o Cliente ten a condición de consumidor para os efectos do Real Decreto Lexislativo 1/2007, do 16 de novembro, polo que se aproba o texto refundido da Lei Xeral para a Defensa dos Consumidores e Usuarios e outras leis complementarias, ten dereito a desistir do Contrato de Subministración nun prazo de 14 días naturais sen necesidade de xustificación e sen penalización ningunha. Para exercer o seu dereito de desistencia, o Cliente deberá comunicar de forma fidedigna o seu desexo de desistir á COMERCIALIZADORA por calquera medio do que poida quedar constancia veraz.

Se o Cliente comezase a consumir enerxía eléctrica durante o período de desistencia, o Cliente deberá aboar o prezo da enerxía subministrada.

A COMERCIALIZADORA tramitará dita desistencia ante a empresa Distribuidora.

9.4. O Cliente poderá resolver o presente contrato sen penalización ningunha, sempre que se modifiquen as cláusulas contractuais do mesmo sen aceptación do propio Cliente, e sen prexuízo do establecido na Condición 2.7. deste contrato.

9.5. Para a virtualidade da resolución do contrato polas causas anteditas, requirirase comunicación fidedigna á outra parte mediante os mecanismos de comunicación indicados nas Condicións Particulares deste contrato.

10. SUSPENSIÓN DA SUBMINISTRACIÓN.

Sen prexuízo de calquera outro dereito que asista á COMERCIALIZADORA baixo o presente Contrato ou conforme á lexislación aplicable, en caso de impagamento por parte do Cliente, ENERXÍA GALEGA MÁIS S.L. poderá ordenar á empresa Distribuidora da zona a suspensión da subministración, de acordo coa normativa vixente, e previo requirimento por escrito ao Cliente.

O exercicio pola COMERCIALIZADORA do dereito a suspender a subministración non exime o Cliente da obriga de pagar o importe da facturación pendente, conforme ao establecido no Contrato de Subministración. No caso de que o Cliente satisfaga a totalidade da débeda, instarase á Distribuidora para o restablecemento da subministración o día seguinte hábil a aquel en que se tivese coñecemento de que se realizou o pagamento da cantidade debida.

Outras causas de suspensión:

1. a) Indispoñibilidade da rede transporte ou distribución.
2. b) Forza maior. Considéranse causa de forza maior os feitos imprevisibles, así como os previsibles que sexan inevitables e irresistibles, alleos á vontade do Cliente e de ENERXÍA GALEGA MÁIS S.L., desde o momento en que os mesmos imposibiliten o cumprimento das obrigas do presente Contrato de Subministración.
3. c) Uso da enerxía subministrada en forma ou para usos distintos dos contratados.
4. d) Realizar derivacións ou enganches a instalacións non previstas no Contrato, revender ou ceder a terceiros a enerxía subministrada.
5. e) Non permitir o acceso ao persoal autorizado pola empresa Distribuidora para inspeccionar as instalacións e/ou equipos correctores.
6. f) Manipular as instalacións e/ou equipos de medida ou control.
7. g) Deficiente conservación das instalacións ou equipos correctores.
8. h) Risco para as persoas ou bens.
9. i) Nos supostos previstos na normativa eléctrica vixente, e de forma especial o incumprimento de calquera obriga que dita normativa impoña ao Cliente como usuario do servizo.

En caso de que proceda a suspensión da subministración por falta de pagamento, a COMERCIALIZADORA solicitará a suspensión á compañía Distribuidora con base nos seguintes parámetros:

– Se se trata dun Cliente persoa física na súa vivenda habitual con potencia contratada igual ou inferior a 10 kW, aplicarase o procedemento do artigo 19 do Real Decreto 897/2017, do 6 de outubro, polo que se regula a figura do consumidor vulnerable, o bono social e outras medidas de protección para os consumidores domésticos de enerxía eléctrica.

– Se se trata de Clientes non incluídos no parágrafo anterior, cando transcorran polo menos cinco (5) días desde que o Cliente fose requirido fidedignamente a emendar a causa de suspensión e sen que se resolva o motivo da suspensión por parte do Cliente. (No suposto de que o Cliente sexa unha persoa física e o punto de subministración sexa a súa vivenda habitual, o prazo será dun (1) mes). En dito requirimento indicarase a data en que finalizará o período de pagamento voluntario da factura impagada, que deberá respectar o prazo mínimo contemplado na normativa de aplicación. Para estes efectos, o requirimento practicarase mediante remisión, ao enderezo postal, correo electrónico ou teléfono que para efectos de comunicacións figure nas Cláusulas Particulares do Contrato de Subministración, ou por calquera medio que permita ter constancia da recepción polo interesado ou o seu representante, así como da data, identidade e contido do mesmo. Dita comunicación deberá incluír o trámite de interrupción da subministración, precisando a data a partir da cal se interromperá, que nunca poderá ser nin en festivo nin en fin de semana.

No suposto de que a COMERCIALIZADORA exercitase o seu dereito a solicitar a suspensión da subministración, non estará obrigada a repoñela ata que o Cliente realizase todos os pagamentos debidos e estes fosen efectivamente aboados nas contas da COMERCIALIZADORA, incluídos os gastos ocasionados pola suspensión e eventual reposición da subministración, así como incluídos os xuros de demora devindicados polo impagamento.

A suspensión da subministración por impagamento ou por algunha das causas establecidas durante o prazo previsto legalmente poderá determinar a resolución do contrato de subministración ou de acceso. A suspensión do acceso nos casos de fraude dará lugar á resolución automática do contrato. Cando a suspensión sexa imputable ao Cliente, este aboará os gastos de desconexión, reconexión e os demais derivados da suspensión, incluídos os xudiciais.

11. CONTRATACIÓN A DISTANCIA.

As partes acordan e consenten de maneira expresa que todas as cuestións relacionadas co desenvolvemento e execución do Contrato, incluída a validez e eficacia de notificacións, así como a contratación de calquera outro tipo de produto ou servizo, sexa ou non enerxético que ENERXÍA GALEGA MÁIS S.L. poida ofrecer ao Cliente, poidan ser realizadas por medios telefónicos, electrónicos ou telemáticos (incluíndo SMS), mediante a utilización de sistemas de códigos concretos de identificación ou de claves específicas de seguridade que poidan ser facilitados para estes fins por ENERXÍA GALEGA MÁIS S.L. Ambas partes acordan dotar de eficacia xurídica e plena validez ao consentimento e aceptación expresado polo Cliente a través dos medios anteriormente citados. A aceptación do Contrato por parte do Cliente poderá realizarse mediante gravación telefónica, sinatura electrónica ou calquera outro sistema que permita acreditar de forma fidedigna a vontade do Cliente. En caso de contratación telefónica ou electrónica dos servizos indicados neste Contrato e unha vez que se levasen a cabo as gravacións ou rexistros telemáticos oportunos, o envío do Contrato terá a consideración de confirmación documental do consentimento previo outorgado de acordo co que dispón a Lei 34/2002, de servizos da sociedade da información e de comercio electrónico. Para tal efecto, este Contrato entenderase perfeccionado desde o momento da gravación ou rexistro do consentimento, sen necesidade de que sexa validado coa sinatura do Cliente e/ou a devolución dunha copia dos documentos mencionados, sen prexuízo da reserva a que se refire a cláusula 12. deste Contrato. En todo caso, e como se establece na cláusula 3., o inicio da subministración determinará o inicio do prazo anual de duración do Contrato.

12. RESERVA EN RELACIÓN Á CONCLUSIÓN E ACTIVACIÓN DO CONTRATO.

O axente comercial que puidese representar a ENERXÍA GALEGA MÁIS S.L., no momento da sinatura do presente Contrato ten unicamente as facultades de promover os Contratos para ENERXÍA GALEGA MÁIS S.L., pero non de concluílos, facultade que queda reservada exclusivamente a ENERXÍA GALEGA MÁIS S.L.  Esta poderá, en función da solvencia do Cliente que desexe contratar e das incidencias que o mesmo puidese ter en rexistros de morosos ou outras obrigas impagadas, rexeitar a activación ou formalización do Contrato sen necesidade de xustificación ningunha e sen dereito a reclamación ningunha por parte do propio Cliente que desexaba realizar a contratación.

13. PROTECCIÓN DE DATOS DE CARÁCTER PERSOAL.

13.1. Os datos persoais facilitados polo Cliente serán incorporados a un ficheiro do que é responsable ENERXÍA GALEGA MÁIS S.L., que está rexistrado na Axencia Española de Protección de Datos, coa finalidade de levar a cabo a xestión contable, fiscal e administrativa derivada da mencionada relación, xestionar a prestación de servizos encomendada e, eventualmente, enviar información comercial e publicitaria sobre servizos da COMERCIALIZADORA.

13.2. Os datos persoais do Cliente serán obxecto de tratamento por parte do persoal da Compañía que así o requira en función do seu posto de traballo. Así mesmo, a COMERCIALIZADORA queda autorizada a comunicar os seus datos persoais a terceiras Compañías que poidan colaborar para a prestación do servizo ou que presten servizos que poidan ser de interese para o Cliente.

13.3. O Cliente poderá revogar en calquera momento o seu consentimento e exercitar os seus dereitos de acceso, rectificación, cancelación e oposición ao tratamento dos seus datos enviando unha solicitude por escrito a ENERXÍA GALEGA MÁIS S.L., Ref: “Protección de datos”, domiciliada en C/ Vilar nº 7 San Cosme de Barreiros 27790 LUGO, a través de calquera medio de comunicación admitido en dereito.

O Cliente é expresamente informado de que, en caso de non cumprir coas obrigas de pagamento derivadas do presente Contrato nos prazos pactados, os datos relativos ao impagamento poderán ser comunicados a ficheiros relativos ao cumprimento ou incumprimento de obrigas dinerarias, iso ao abeiro do previsto no Regulamento Xeral de Protección de Datos e a Lei Orgánica 3/2018 ou substitutos.

13.4. Coa sinatura deste Contrato o Cliente autoriza a ENERXÍA GALEGA MÁIS S.L. a verificar mediante gravación telefónica a veracidade dos datos facilitados.

13.5. En caso de non querer recibir comunicación comercial por parte de ENERXÍA GALEGA MÁIS S.L., poderá revogar o seu consentimento marcando o recadro correspondente nas Condicións Particulares do presente Contrato.

14. GARANTÍAS DE ORIXE

ENERXÍA GALEGA MÁIS, S.L. poderá ofrecer aos seus Clientes a contratación de garantías de orixe de electricidade procedente de fontes de enerxía renovable (GdOs).

A contratación de GdOs terá carácter voluntario. En caso de que o Cliente opte pola súa contratación, o seu prezo, así como o resto de condicións aplicables, recolleranse nas Condicións Particulares do contrato.

En tal caso, ENERXÍA GALEGA MÁIS, S.L. procederá á correspondente redención das GdOs pola enerxía efectivamente subministrada, de conformidade coa normativa vixente.

15. AUTOCONSUMO.

Naquelas subministracións nas cales exista unha instalación de autoconsumo con eventual dereito a compensación simplificada, pero a mesma non fose notificada a ENERXÍA GALEGA MÁIS S.L., o prezo de compensación pola xeración excedentaria será do 90% do prezo horario de mercado indexado establecido por OMIE, en tanto en canto o Cliente non asinase as condicións económicas concretas para o aboamento de ditos excedentes por parte da COMERCIALIZADORA.

16. COLABORACIÓN.

As partes comprométense a colaborar reciprocamente poñendo á disposición da outra os medios e información que sexan necesarios para o cumprimento do presente contrato.

17. LEXISLACIÓN.

O presente Contrato de Subministración estará rexido e será interpretado de acordo coa lexislación española común, e en particular coa Lei 24/2013, do Sector Eléctrico e a súa normativa de desenvolvemento.

18. RESOLUCIÓN DE CONFLITOS.

O Cliente terá dereito a presentar as súas reclamacións ou peticións de información por escrito a través do correo electrónico dirixido a [email protected] ou a través do teléfono de atención ao cliente (900373371).

Para o caso de non estar satisfeito coa resolución da incidencia poderá dirixirse ao organismo competente da súa comunidade autónoma, en virtude do disposto no artigo 58 do RD 88/2026.

No caso de que se produza calquera discrepancia ou controversia derivada da interpretación, aplicación e/ou execución do presente contrato, os Clientes que reúnan a condición de consumidores para os efectos do art. 3 do Real Decreto Lexislativo 1/2007, do 16 de novembro, polo que se aproba o texto refundido da Lei Xeral para a Defensa dos Consumidores e Usuarios e outras leis complementarias, poderán acudir ao Sistema Arbitral de Consumo regulado no art. 57 do mesmo corpo normativo. O Cliente poderá dirixirse á Xunta Arbitral de Consumo Autonómica correspondente para as materias responsabilidade da COMERCIALIZADORA sometidas a dito arbitraxe, ou ben á Administración correspondente consonte a normativa aplicable.

19. OUTROS SERVIZOS.

ENERXÍA GALEGA MÁIS S.L. poderá ofrecer ao Cliente servizos accesorios á subministración eléctrica que serán facturados dentro da propia factura eléctrica a xirar ao Cliente, identificando en liñas separadas do resto de conceptos facturables os conceptos e os importes a devindicar polos eventuais servizos contratados. Ditos servizos deberán ser explicitados de forma detallada e transparente nas Condicións Particulares deste Contrato ou nas correspondentes Addendas a ditas Condicións Particulares.

20. FORO.

Ambas partes contratantes sométense á xurisdición e competencia dos Xulgados e Tribunais do lugar de subministración.

21. INFORMACIÓN SOBRE DEREITO DE DESISTENCIA.

Aqueles clientes considerados consumidores e usuarios para os efectos previstos no Real Decreto Lexislativo 1/2007, do 16 de novembro, polo que se aproba o texto refundido da Lei Xeral para a Defensa dos Consumidores e Usuarios e outras leis complementarias, terán o dereito a desistir do presente contrato nun prazo de 14 días naturais sen necesidade de xustificación ningunha. O prazo de desistencia expirará aos 14 días naturais a contar desde o día da sinatura do contrato.

O proceso de activación poderá iniciarse coa propia sinatura do contrato por parte do Cliente, con pleno coñecemento dos seus efectos económicos, segundo conste nas Condicións Particulares do contrato e no proceso de contratación, conforme ao previsto nas presentes Condicións Xerais. En calquera caso, a activación efectiva da subministración dependerá dos procedementos e prazos da empresa Distribuidora, sen que ENERXÍA GALEGA MÁIS S.L. poida garantir un momento concreto para dita activación, manténdose o contrato vixente nos mesmos termos que o Contrato de Subministración.

Para tal efecto, en caso de que o Cliente exercite o dereito de desistencia dentro do prazo de catorce días que establece a Lei Xeral para a Defensa de Consumidores e Usuarios, deberá aboar a ENERXÍA GALEGA MÁIS S.L. o importe proporcional correspondente á subministración efectivamente realizada ata a data en que se produza a desistencia, conforme aos prezos e condicións contractuais aplicables.

Para o exercicio do dereito de desistencia o Cliente deberá notificar dita decisión por correo postal enviado a ENERXÍA GALEGA MÁIS S.L., C/ Dr. Cadaval 3, 2º, 36202 VIGO ou mediante comunicación vía electrónica a [email protected]. Unha vez exercitado o dereito de desistencia, ENERXÍA GALEGA MÁIS S.L., non procederá a efectuar subministración/s ningunha/s ou deixará de realizala/s en caso de que se iniciase/n a/s mesma/s.

O Cliente poderá utilizar o modelo de desistencia que figura a continuación, aínda que o seu uso non é obrigatorio.

FORMULARIO DE DESISTENCIA

Mediante a sinatura do presente formulario,

Razón Social/Nome e Apelidos_______________________ con CIF/DNI______ con domicilio en __________________________ expresa a súa vontade de desistir do contrato con número CUPS_____________________.
Representante_______________ con CIF/DNI______.

En _______________ a ____________.

Polo Cliente (sinatura e selo)